21.10.2016 - 16.12.2016

У трох этапах алімпіяды прынялі ўдзел каля 5 000 навучэнцаў X-XI класаў з усіх раёнаў і абласцей Беларусі. У фінал выйшлі 20 старшакласнікаў.

Рэспубліканская алімпіяда па фінансавай граматнасці праходзіць у Беларусі ўжо ў трэці раз і стала за гэты час адным з найбольш маштабных мерапрыемстваў па павышэнні фінансавай граматнасці насельніцтва.

Заданні алімпіяды ўключалі пытанні ў выглядзе тэстаў з варыянтамі адказаў па шэрагу ключавых тэм: банкаўскай справе, рынку каштоўных папер, страхаванню, падаткаабкладанню і т. д. У гэтым годзе акцэнт зроблены на такія актуальныя пытанні: як прайшла дэнамінацыя беларускага рубля, адзыўныя і безадзыўныя уклады, лічбавы банкінг.

Парадак правядзення рэспубліканскай алімпіяды па фінансавай граматнасці зацверджаны сумеснай пастановай Праўлення Нацыянальнага банка Рэспублікі Беларусь і Міністэрства адукацыі Рэспублікі Беларусь ад 16 верасня 2016 г № 490/91.

ВЫНІКІ

Фіналістаў і ўсіх удзельнікаў заключнага этапу алімпіяды павіншаваў намеснік Старшыні Праўлення Нацыянальнага банка Сяргей Калечыц. «Фінансавыя веды дазваляюць чалавеку не залежаць ад абставінаў. Фінансава адукаваны чалавек здольны сам выбіраць найбольш прывабны шлях у жыцці, ствараючы матэрыяльную аснову для развіцця ўсяго грамадства. Гэта разумная інвестыцыя ва ўласную будучыню! », – падкрэсліў С. Калечыц. Ён падзякаваў кіраўніцтву і спецыялістам Міністэрства адукацыі, а таксама выкладчыкам устаноў адукацыі, якія былі задзейнічаныя ў працы па павышэнні фінансавай граматнасці дзяцей і моладзі.

Пасля фінальнага паядынку і падвядзення вынікаў заключнага этапу алімпіяды журы назвала лепшых з лепшых.

Пераможцам Рэспубліканскай алімпіяды па фінансавай граматнасці ў 2016 годзе стаў Вадзім Рыбачук з Брэста. Вадзім вучыцца ў Брэсцкім абласным ліцэі. Самаму фінансава граматнаму старшакласніку Беларусі ўручаны Дыплом I ступені і каштоўны прыз – планшэтны кампутар.

«Серабро» алімпіяды ў выглядзе дыплома II ступені і смартфона павёз у Вілейку (Мінская вобл.) Навучэнец Вілейскай гімназіі № 2 Іван Ануфраёнак.

Дыплом III ступені і фотаапарат дасталіся Паўлу Салею, які вучыцца ў Дубненскай сярэдняй школе (Мастоўскі р-н, Гродзенская вобл.).