Ці ведаеце вы, што на падатках можна эканоміць?
Для гэтага існуюць падатковыя вылікі. Падатковы вылік − гэта сума, на якую памяншаецца падатковая база. А падатковая база, у сваю чаргу − гэта сума, з якой трэба аплаціць той ці іншы падатак. Чым менш падатковая база - тым менш сума падатку да выплаты.
Адзін з відаў падатковых вылікаў у Беларусі − маёмасны падатковы вылік. Яго прадастаўляюць пры куплі або будаўніцтве жылля для тых, хто мае патрэбу ў паляпшэнні жыллёвых умоў. Гэта вельмі значная падатковая льгота, атрымліваць якую можна на працягу многіх гадоў. Разбярэмся падрабязна, у чым сутнасць дадзенага падатковага выліку і як яго атрымаць.
Хто можа атрымаць падатковы вылік пры куплі жылля
Падатковы вылік пры куплі або будаўніцтве жылля прадастаўляецца толькі тым, хто стаіць на ўліку маючых патрэбу ў паляпшэнні жыллёвых умоў. Пры гэтым не важна, дачакаліся вы сваёй чаргі і атрымалі льготны крэдыт, альбо не дачакаліся і пачалі вырашаць жыллёвае пытанне сваімі сіламі – у абодвух выпадках вы маеце права на падатковы вылік.
Сутнасць выліку заключаецца ў тым, што грошы, выдаткаваныя на паляпшэнне жыллёвых умоў, не абкладаюцца падаходным падаткам. Стаўка падаходнага падатку ў Беларусі складае 13%. Вылік прадастаўляецца па месцы працы. З вашай зарплаты перастануць утрымліваць падаходны падатак да таго часу, пакуль не «набяжыць» эканомія ў 13% ад сумы, выдаткаванай на паляпшэнне жыллёвых умоў.
Галоўнае, перад тым як купляць або будаваць жыллё, трэба ўстаць на ўлік маючых патрэбу ў паляпшэнні жыллёвых умоў. Нават калі вы плануеце вырашаць жыллёвае пытанне самастойна, без ільгот і працяглага чакання. Дарэчы, калі жыллё набываецца ў крэдыт, вылік таксама працуе. Прычым у якасці выдаткаванай сумы будзе ўлічвацца не толькі асноўная сума крэдыту, але і працэнты, якія вы заплаціце банку.
Калі жыллё набывалася сямейнай парай, абодва сужэнцы маюць права атрымліваць падатковы вылік да таго часу, пакуль не "набяжыць" эканомія ў 13% ад сумы, выдаткаванай на паляпшэнне жыллёвых умоў.
Як працуе падатковы вылік пры куплі жылля
Разгледзім на прыкладзе. Грамадзянін набывае жыллё за 100 тысяч беларускіх рублёў. Менавіта столькі і складзе сума падатковага выліку – 100 тысяч. Такім чынам, 100 тысяч рублёў, якія заробіць гэты грамадзянін, не будуць абкладацца падаходным падаткам. Агульная сума эканоміі па падатку павінна скласці 13 000 рублёў (100 000 х 13%)
Напрыклад, налічаная зарплата грамадзяніна складае 1500 рублёў. З яе ён павінен заплаціць 13% падаходнага падатку – гэта 195 рублёў. Аднак дзякуючы падатковаму выліку дадзенае ўтрымліванне спаганяцца не будзе. Кожны месяц грамадзянін будзе атрымліваць на рукі на 195 рублёў больш да таго часу, пакуль яго сукупны налічаны заробак не дасягне сумы, выдаткаванай на жыллё (100 тысяч рублёў).
100 000 / 1500 = 66,6 месяцаў. То бок, у нашым прыкладзе грамадзянін не будзе плаціць падаходны падатак на працягу 5,5 гадоў.
Важна разумець, што гэта прыблізны разлік. У рэальнасці зарплата грамадзяніна з часам будзе змяняцца, а значыць, зменяцца і тэрміны кампенсацыі 13% ад сумы, выдаткаванай на паляпшэнне жыллёвых умоў.
Як атрымаць падатковы вылік пры куплі жылля
Дадзены падатковы вылік прадастаўляецца па месцы працы (службы, вучобы). Трэба падаць у бухгалтэрыю наступныя дакументы:
- Даведку з мясцовага выканкама аб тым, што вы і члены вашай сям'і ў момант набыцця жылля былі на ўліку маючых патрэбу ў паляпшэнні жыллёвых умоў;
- Калі вы будуеце кватэру ў складзе жыллёва-будаўнічага кааператыва – выпіску (альбо яе копію) з рашэння агульнага сходу членаў арганізацыі забудоўшчыкаў аб уключэнні вас альбо членаў вашай сям'і ў склад жыллёва-будаўнічага кааператыва;
- Калі вы будуеце дом – копію дамовы аб будаўніцтве;
- Калі вы паляпшалі жыллёвыя ўмовы шляхам рэканструкцыі дома або кватэры – рашэнне мясцовага выканкама аб зняцці з уліку ў сувязі з ажыццёўленай рэканструкцыяй жылля плюс копію дагавора будаўнічага падраду на рэканструкцыю;
- Калі вы купляеце ўжо гатовую кватэру або дом – копіі дакументаў, якія пацвярджаюць рэгістрацыю права ўласнасці на нерухомасць, дагавор куплі-продажу;
- Калі жыллёвае пытанне вырашаецца ў крэдыт – копію крэдытнага дагавора з банкам (крэдыт абавязкова павінен быць мэтавым, на нерухомасць). У далейшым, па меры пагашэння пазыкі, трэба будзе прадастаўляць бухгалтару дакументы, якія пацвярджаюць факт ажыццяўлення плацяжоў.
У шэрагу выпадкаў могуць спатрэбіцца і некаторыя іншыя паперы. У цэлым, сутнасць усяго пакета дакументаў зводзіцца да неабходнасці пацверджання таго факту, што вы сапраўды мелі патрэбу ў паляпшэнні жыллёвых умоў і выдаткавалі на гэта грошы. Поўны пералік можна знайсці на сайце МПЗ
Калі вы, акрамя / замест зарплаты, атрымліваеце іншыя віды даходаў, з якіх трэба плаціць падаткі, дакументы для атрымання падатковага выліку трэба падаць у падатковую інспекцыю разам з дэкларацыяй аб даходах.
Маёмасны падатковы вылік - добрая магчымасць вярнуць назад 13% выдаткаваных на жыллё грошай. Калі падобная льгота вам належыць, абавязкова ёй скарыстайцеся!